Date: Aug, 2009 ~ Age: 穎穎 1Y9m / 雯雯: 初生 BB
從來沒有想過一個人湊兩個 B 係咁辛苦.
辛苦o既地方不是疲倦,
而係怎樣在同一時間去照顧兩個囡, 而 time
management 都係一個好大o既學問.
如果兩個囡同一時間肚餓, 大囡扭晒計, 細囡又大喊,
我就要想想去做邊樣野先? 如果兩個囡同一時間痾了便便, 我就要想想去照料邊個先?
如果餵餵下奶奶比細囡, 亞大囡又話要痾便便, 又或者已經痾了
shu shu 落地下, 在那一刻我怎樣阻止大囡唔好去踏在 d shu shu 度? 如果餵餵下奶奶比細囡, 亞大囡又爬上來梳化想搞亞妹,
我又冇手拉番大囡落地, 果刻我應該點做?仲有好多瑣碎的事/家務, 我要諗做邊樣先, 邊樣後; 而當兩個囡同一時間大喊, 我個頭就痛.
星期一至五穎爸返左工的日子, 就開始我o既一個人湊兩個B的時光喇,
我多數在 4:30 a.m. 起身去客廳餵雯雯飲奶奶, 由於雯雯係一個好難掃風嘔氣的 BB, 通常由餵奶到放番佢落床都要半個小時, 加埋其他準備工作/換片片….都用左我好多時間.
餵完和就返房和穎穎睡, 現在兩姐妹要分開睡,
我和穎爸一人mark 一個.
早上
到7:00 a.m. 我又起身餵奶,
餵完又返去同穎穎一齊再睡, 大約 9 a.m.
穎穎醒了, 佢會同我傾一輪計,
然後佢會講: “奶奶”,
穎穎飲奶奶, 會自己走去玩玩具,
睇書書, 在這時候
(大約 10:30 a.m.) 我就會去梳洗,
然後和穎穎一齊食包包, 食完早餐之後就開始我o既煩瑣又做唔完o既家務:
煲水, 掃地,
洗下紗巾, 執下屋,
執下穎穎d 手尾……
之後就陪穎穎玩喇. 現在每隔
2.5小時至3小時餵奶奶給雯雯,
好彩雯雯這個年齡多數日間會睡覺, 咁我可以陪穎穎.
嬲嬲的事在這時候, 最難頂o既就係穎穎玩玩具時, 成日掟玩具落地, 掟到 “pong pong” 聲, d 積木又成樽倒落地, 整到 “ping ling pong pong”, 嘈醒雯雯, 當我責備穎穎, 佢又不開心地偏晒咀, 然後大喊, 嘈醒雯雯.
如是者兩姐妹一齊大喊, 而我又好眼訓, 這一刻我情緒就急轉直下, 個頭真係好痛. 現在我是不會縱穎穎, 我係咁同佢講道理, 話佢這種行為不對; 之後又要去按撫下喊緊o既雯雯, 搞到我喉嚨都乾埋.
中午
通常婆婆會煮好飯或買了飯盒給我和穎穎食, 有時會問下我, 要不要帶穎穎落樓下等佢湊一陣, 如果我不是太累, 都不會勞煩婆婆.
為了節省時間, 我會和穎穎兩個人埋頭一齊食, 穎穎食得好慢好dirty, 我就一”你一啖我一啖”咁 “好sweet 咁”食. 如果在這時候雯雯肚餓, 或痾了便便, 我通常都等穎穎食飽了再去理會雯雯, 因為穎穎食到天一半, 地一半, 我想穎穎一氣呵成食晒餐飯為止.
先決事項
如果兩個囡同一時間痾了便便, 我就會照顧大囡先,
因為一個識行識走o既小朋友,
如果唔第一時間同佢做清潔善後, 後果將會好”大 獲”;
而亞妹就可以等, 佢點郁都唔會整到d
便便周圍都係. 所以如果兩姐妹同一時間肚餓或要痾，我一定先照顧大囡.
難題一
輪到餵雯雯飲奶奶, 穎穎就會搞搞震,
在這時候, 我就會播 DVD
比穎穎睇，佢好留心咁睇，我就可以安心餵奶，但試過有一次, 餵餵下雯雯,
穎穎講 : “痾～” 有彩我旁邊有個potty, 我立即用下巴頂著個奶樽，騰空一隻手出來，拉個potty過來，再單手脫去穎穎條衭，拉穎穎坐在potty, 然而不停對穎穎講唔好走開，直至我餵完雯雯為止才幫穎穎清潔善後．
不過試過餵餵下雯雯，穎穎冇出聲就已經痾了便便或 shu shu 落地,
在那一刻我就叫穎穎企在原地，唔好踏隻腳去 d shu shu
度，然後我立即用下巴頂著個奶樽，騰空一隻手出來去拿電話，call 婆婆上來幫我收拾這個混亂的局面．我現在學“精”了，餵雯雯飲奶奶一定要放 potty, 紙巾，電話，TV remote control 在我旁邊．
難題二
有時就算開了DVD比穎穎睇，我餵雯雯時，穎穎會爬上梳化想摸亞妹，摸下佢個頭，同佢玩握握手，摸佢隻腳，幫手掃風；摸手腳我可以接受，摸頭就一定唔得，而且穎穎咁樣好容易跌落梳化頭落地先，所以佢一爬上來，我就不停“no”
佢，當然佢係唔會聽，咁我又立即用下巴頂著個奶樽，單手拉拉番穎穎落地，如果拉唔到佢落地，我唯有提起隻腳做”人肉圍欄“ 欄著佢背脊，以防佢跌落地，真係好煩架！最慘就係有時雯雯飲奶飲得好慢，飲成半小時，我隻手同隻腳就好累喇．
而家穎穎成日講“掃風”，話幫亞妹掃風喎～ 難題三
有時我需要去洗手間，或其他事要行開行埋，我多數用呢一招：開DVD 比穎穎睇，等佢坐定定．
下午
通常婆婆會上來幫我和雯雯沖涼，我冇信心一個人同初生兒沖涼，好驚會“sin”手．在這時候，我又要開DVD 等穎穎坐定定，唔好搞住晒．
到了四點，我又要開奶比穎穎，因為佢要飲住支奶先至可以睡到晏覺．在這時侯，我就可以小睡一小時，咁亞妹就一個人在客廳睡喇，通常我都好醒訓，雯雯一喊我就起身去睇佢，所以這個鐘數我都係客廳睡房兩邊走．
穎穎會在 5:30 p.m. 或 6:00 p.m. 醒，如果我不太累，我會5:00 p.m. 起身去洗奶樽，否則會等穎爸放工回來佢洗 （好數都係佢洗架喇～）
到穎穎醒了，我又陪佢玩或睇書，如是者又 repeat 返佢掟玩具“pong pong”聲嘈醒雯雯，如是者又 repeat 返我情緒急轉直下，火到黎ｏ既心情．
晚上
穎爸放工回家就整定ｄ薑水比我沖涼，及做大部份ｏ既家務，一來我很累，二來我坐月唔touch 得生水．晚上我地兩夫婦就一腳踢輪流照顧兩個B, 輪流食晚飯喇. (8 p.m. 我餵穎穎食, 8:30 p.m. 我自己食, 9 p.m. 穎爸食)
11:30 p.m. 我就開支奶奶比穎穎，然後同佢一齊在睡房睡，雯雯和穎爸成晚就在客廳睡．而雯雯 1 a.m. 支奶奶就由穎爸負責．
到了4:30 a.m., 雯雯喊要食奶奶，我就和穎爸換位置，我出客廳餵雯雯，然後在客廳睡直至 9 a.m. 穎穎睡醒．
而一日廿四小時我真的抽不到時間上網．
我諗我這11weeks產假的生活就是這樣子，不過這種生活亦只是很短暫，10月我又要上班，而穎穎會習慣和妹妹相處；我真是很佩服以前的年代的婦女一個人湊４，５個，或更多的仔女，仲要煮埋飯，洗埋衫 ,
無人幫．
我唔駛煮飯, 又可以隨時 call
婆婆黎幫手已經好好架啦~
{{亞妹喊}}
{{穎穎又喊, 我就頭痛喇.}}
{{餵完雯雯食奶奶後的指定動作}}
{{不過雯雯係一個好難掃風的BB}}
{{最勞氣係穎穎在我最唔得閒時搞搞震..... 在大人床上搞床頭燈}}
{{成日搞我電話, 周不時 send 了短訊比唔知邊個}}
{{有時又玩厠紙, 甚不環保}}
{{好彩細 B 日間多數睡瞓}}
{{咁我都可以抖抖氣}}
{{但有時亞妹比穎穎嘈醒時會嚇一跳, 你睇佢個樣幾驚}}
{{忙裡偷閒, 抽少少時間影下相}}
{{穎爸放工回家幫細 B 沖涼, 佢一個人都搞得掂架 !! }}
{{望住佢兩姐妹, 幾辛苦都唔怕}}
你真係叻﹗自己搞掂﹗係我就唔放過婆婆喇﹗
有冇諗過比穎穎返學 (佢返咗學 .. 起碼有段時間湊少個 )
嘗試比簡單任務穎穎做 .. 搵機會讚佢叻 .. 讚佢幫到手 .. 我諗佢會好樂意做 ..
安排DVD比穎穎睇 .. 安排益智玩意比穎穎玩..
有冇諗過比穎穎返學 (佢返咗學 .. 起碼有段時間湊少個 )
嘗試比簡單任務穎穎做 .. 搵機會讚佢叻 .. 讚佢幫到手 .. 我諗佢會好樂意做 ..
安排DVD比穎穎睇 .. 安排益智玩意比穎穎玩 .. 諗諗計仔令穎穎一個專心做的事情 .. 咁樣你又可以理少一個 .. 同時又可以訓練穎穎的耐性 ..
當你照顧妹妹時 .. 穎穎作反 .. 我估穎穎正在呷醋 .. 佢想你專心一意理佢 .. 所以令你忙亂 .. .. 其實穎穎仲未接受到妹妹 .. 比多少少時間穎穎 .. 切記 : 就算穎穎搗蛋 .. 都唔好鬧得佢太過份 .. 因為在佢角度 .. 佢只會更不滿妹妹的存在 ..
我沒有任何經驗 .. 只是身邊有不少媽媽朋友 .. 佢地點做 .. 我提供意見給你
湊兩個小朋友真係非常吃力 .. 穎媽要加油呀 !!
(P.S. 嘗試從穎穎角度嚟感受下 .. 效果會更理想 )