Date: 21 Aug, 2009 ~ Age: 1
month
雯雯係一個愛睡多於愛食的BB, 佢可以隔 3 至 3.5 小時才食一餐奶.
很多時都係我弄醒她飲奶奶, 試過有一次我太攰, 瞓晏覺瞓過龍, 起身才知道雯雯有成 4.5 小時未飲奶奶, 果一刻我心諗:
"敝啦~ 敝啦~ 瞓過龍~ " 於是我拍醒佢, 佢居然飲左 60 ml, 我真係唔明, 佢飲咁多應該係肚餓, 點解佢唔會喊o既?
咁有好有唔好啦, 好o既係瞓多 d, 長肉 d, 媽媽可以輕鬆 d; 唔好o既係怕佢吸收唔夠營養
雯雯出世的頭一個星期, 我餵佢母乳 (第二個星期開始補奶粉), 姑娘話餵母乳要隔2小時餵一次, 但佢成日瞓,
我已經係隔3小時才餵一次母乳, 我好努力咁整醒佢, 但佢總是咪埋眼, 合埋嘴唔飲奶, 我搞她腳板底, 叫她, "R" 下佢條腰, 搞下佢嘴仔, 拍拍佢 pat
pat, 同佢掃風, 佢都仲係瞓緊覺, 我竟然抱著佢搞了半小時 ! 我的手, 腰和腳攰到不得了.
尤其在凌晨時份, 要搞一大輪先至整得醒雯雯, 真係身心疲累, 在醫院時, 我試過叫姑娘幫手整醒佢,
但連專業o既佢地都整唔醒雯雯.
雯雯好奇怪, 飲母乳飲左 10 ~ 15分鐘又瞓番, 然後又隔3小時先至食下一餐, 點解佢可以飲咁少 !? 就係咁,
雯雯可以話係自己戒了夜奶, 我們在 1:00 a.m. 左右餵奶奶, 到 6:30 a.m. 左右雯雯才哭要吃奶奶.
雯雯o既喊聲好溫柔, 由細細聲慢慢喊到大聲. 雯雯好湊過家姐喎, 穎穎姐姐在 0 ~ 1歲的時候, 一日到黑喊過不停,
我完全唔知佢喊咩, 而最嚇人係穎穎o既喊聲十分大和高音, 可以用 "狂"字來形容佢.
在 0 ~ 1歲的時候, 穎穎一肚餓就用佢最大聲最高音來喊比我地聽, 就好似部 Hi-fi, 唔覺意較左去最大o既
volumn, 一開機就 "pong" 一聲咁, 好嚇人架.
最癲o既係果時穎穎由凌晨 12:30 a.m. 斷斷續續喊到 4:30 a.m., 我就斷斷續續抱著穎穎在客廳行來行去噯佢瞓,
所以我果時好快就修左身.
不過雯雯掃風要好耐, 佢要掃 15 ~ 20 分鐘先至嘔氣, 所以由開奶奶到放返雯雯去 BB 床都要用成 30 ~ 45
mins. 如果雯雯唔嘔啖氣出黎, 佢好容易會噴番半支奶出黎, 佢唔係嘔奶奶咁簡單, 係大噴果隻, 噴得好遠, 所以我地幾攰都好, 一定要同佢掃到風為至.
另一樣煩野係雯雯好鐘意飲飲下奶奶時痾便便, 往往要等佢飲完奶奶掃一大輪風先至可以同佢清潔換片.
除左呢兩樣, 雯雯真係好湊過家姐好多 ! 而且雯雯重得快過家姐, 一個月人仔已經好"墜手", 我抱佢飲奶奶時我大腿都有 d
腳痺.
唔知同食人奶有冇關, 熹熹細個時都係成日食食下奶便便, 不過我會同佢換左片片先, 如果佢未食飽, 換完片之後再食再掃風!