我錯了

Date:  28 Feb, 2011 ~ Age:  3Y4m2w

這晚如常一家四口在婆婆家食晚飯, 吃過飯後, 爸爸上樓上洗澡, 我和穎穎雯雯在公公的客房玩玩具, 之後我聽到亞姨對舅父說了一些話, 然後舅父進來, 拿著一個座枱月曆問穎穎:  "你知唔知呢一頁放左去邊?", 穎穎繼續玩玩具, 沒有回答舅父, 我問他們發生了什麼事, 婆婆說穎穎今日去亞姨的房間, 在座枱月曆的第一頁(即一月份那頁)畫了一個太陽, 第二頁被穎穎撕掉, 而被撕掉的一頁寫了資料, 他們都在找尋那一頁.

我看了那個月曆, 第一個感覺是那個太陽畫得幾靚喎, 有眉有眼有鼻有嘴, 有數十條放射線.

由於穎穎沒有回答, 舅父再問(以小朋友口吻, 氹佢問):  "呢個月曆係舅父送比姨姨, 姨姨寫左d 野o係上面, 你可唔可以幫我搵返果頁出黎?"  穎穎繼續玩玩具, 又全屋跑來跑去, 大人捉不住她, 她就"咔咔"大笑, 始終沒有正經回答舅父.

婆婆也有加入質問穎穎, 又說穎穎曳:  "穎穎你唔好咁曳啦!", 公公說:  "算啦, 唔好問喇, 唔見左由佢啦", "唔好再問喇."

我見穎穎沒有聽大人說話, 只是在客廳嬉戲, 就雙手接著她的肩膀, 問:  "你係咪搣左果頁?  d 野係亞姨架喎", "你擺左果一頁去邊度呀?"

穎穎沒有答我, 鬆開我的手繼續在客廳嬉戲, 我便對她說:  "媽咪同你講道理, 你知唔知你咁做唔岩架? 人地d 野你唔可以攞, 知唔知呀?"

舅父也對穎穎說, 不可以取別人的東西, 如果想要, 要先問人.

之後我帶穎穎雯雯返上樓上, 對爸爸說剛才的事.
怎料爸爸問我:  "你有冇問過穎穎, 係咪佢做?"
我:  "冇呀."
爸爸:  "你有冇問過佢地, 有冇人親眼看到穎穎搣?"
我:  "冇呀"
爸爸:  "你點做人亞媽架!?  你唔係應該先求證左係咪亞穎做先!?"

我口窒窒說:  "咁好自然諗係亞穎搣... (繼續口窒窒)... 冇理由係亞姨自己搣爛...."

爸爸:  "你地咁多個大人兇佢, 話佢, 係唔岩架!  佢咁細個, 得三歲咋", "我係會睇證據, 都冇人親眼睇到, 就唔好一口咬定係亞穎, 香港都講法律講證據, 無證據只可以話佢係"嚴"疑犯, 唔係疑犯, 我係佢daddy, 我係會保護佢, 我會捉佢去一間房, 慢慢問佢, 唔係好似你地咁成班人攻佢."

我很慚愧地說:  "咁我都有問亞穎係咪佢做o既."

爸爸:  "咁都唔岩, 你咁問佢即係你一開始就認為係佢做, 唔信自己個女, 佢會覺得連亞媽都唔信佢."

我覺得爸爸講得好有道理, 但當時我內心仍是想教好個囡, 教佢做人o既道理.

在穎穎臨睡前, 我問穎穎今日下午有冇走去亞姨間房, 有冇撕了一頁, 穎穎答"我唔知道", 跟住穎穎講下其他話題, 過了一陣, 穎穎說是雯雯撕掉一頁月曆, 將那一頁放了在椅子底下.

我即時怪自己蠢, 今天竟然如此對待自己的女兒, 我竟然懷疑她做了曳曳的事情, 對她沒有信心, 我懷疑她, 即是懷疑了自己的教女方法不能教出一個乖孩子.

我即向穎穎說真是對不起, 大家都誤會了你, 又教她應該將真相說出來, 不是你做就說不是你做的, 應該說是雯雯做的, 不然大人會誤會了你.

我不知道穎穎明不明白我所說, 她好像不以為然, 不介意, 還童真地叫我說故事給她聽.

早上起床, 我對爸爸說原來是雯雯做, 當然爸爸有責備我的不是, 我再說我教了穎穎要說真相, 把事實說給大人知, 爸爸即說:  "你有冇諗過穎穎唔"篤"雯雯出黎, 係保護緊亞妹架?"

大人一向主觀認定錯事一定是小朋友做, 今次我錯了, 做媽媽的, 一不小心, 必會令子女留下永遠的心靈傷害, 我會好好記著今次自己所犯的錯, 以此為鑑.

我又一次見到老公待人處事都比我成熟.