穎穎雯雯成長日記: [雯雯篇] 大膽雯.嚇C人

Date: July, Aug, Sept, 2010 ~ Age: after 13 months

我親愛o既二公主, 係個大膽B ! 人仔細細, 藝高人膽大!

時常在我地唔覺意o既時候, 做出一 d 嚇到大人心臟病o既事情.

呢個係雯雯自13個月大開始成日做o既動作 - 爬枱:

先爬上綠色的 kid chair, 企一企, 再爬上 kid table, 跟著企o係 kid table,

佢咁做係要搞餐枱上o既野. 好大膽子啊! 嚇C 我啦! 要睇緊呢隻牛牛啦.

在千鈞一髮間, 我快快手拿 DC 仔影佢, 爸爸就企o係旁邊 stand by, 等我按完快門就救人.

去到人地屋企, 冇主場之利, 都一樣爬枱:

爬上 kid chair, 再企圖爬枱, 即刻比我抱番落黎. 在姑媽姑丈面前真係失禮C喇.

想出黎, 唔理個圍欄有幾高, 都會努力爬出黎

小心跌C 你呀, 囡~

睇下細嬌隻強而有力的手丫~ 爸爸一抱起佢, 佢抓住 kid chair 不放手, 連帶 chair 也拎起 *_*

留意雯雯d 手指, 用左四隻手指抓實咋, 大嬌在畫畫, 望都唔望, 好專心畫畫

哈, 細嬌你果然係屬牛, 牛咁大力.

呢日二小姐又騎下鹿仔玩, 未夠一歲已經靈活地自己上, 自己落, 大人冇扶佢架.

(左) 騎左一陣之嘛, 要落地 (右)落地時, 鹿仔和人仔向前傾, 人仔快要失去平衡

(左) 爸爸即刻按住鹿仔頭 (右) 咁都可以爬落地, 真係服左佢

13個月大o既雯雯, 好鍾意玩呢個危險動作, 拍左movie, 有晒曳曳o既罪證架喇:

爬上 BB 搖搖椅上, 跪在黃色布造的 seat 上, 然後用力 "兀" 下 "兀" 下, 整個 B 上上下下咁搖, 好似搖搖板咁, 又好似玩彈床咁

玩完"搖搖板", 仲想爬, 呢個黃色布造 seat 係軟林林o既

8月26日第一次做出呢個危險動作: 站在三輪車上, 之後都表演過幾次

初時雯雯都係自己爬上家姐架三輪車上, 扮下騎三輪車, 冇大人扶佢, 佢都成功爬左上去.

後來, 即係8月26日, 佢雙手扶住車車的 handle, 雙腳爬去然後站在三角形的 car seat 上.....
緊張喇! 佢再放開雙手, 慢慢企直
只有兩隻腳板底和 pat pat 係 "掂" 住架車 ! 佢雙手係冇揸住 handle 架.

然後佢望住大人笑笑口, 好似好 proud of herself, 而大人則嚇到心都離晒 =_="

(因為呢個動作太危險, 個車輪隨時郁, 佢隨時跌落地, 我都唔敢影相, 立即抱佢落黎, 所以 Photo-Retouch 示意佢呢個藝高人膽大o既動作)

至得戚係你啦 !

聽人講, 有d 老人家話屋企有兩個小孩, 多數係一動一靜, 原來係o岩o既.

雯雯上以o既百厭 & 危險動作, 穎穎家姐從來冇做過架!