Date: 7 June, 2010 ~
Age: 2Y7m4w
今天看到一本育兒書寫到:
我真的很有共鳴, 穎穎的固執病, 正是書中所寫的一成不變生活原則, 我被穎穎的指定要用兔仔尿片, 睡前的程序,
氣到我快要斷氣.
近來, 睡前的程序多了一項新程序, 同時, 近幾日又出現奇怪又煩人的要求, 就是臨睡前強烈要求去公公家睡.
先講第一個睡前的程序: (忍不住要用口語化寫下)
程序1) 一定要自己拿 NUK
綠色奶瓶, 因為穎穎動作很慢, 有一次爸爸忍不住, 便沖定奶奶叫佢快d 飲, 快d 瞓, 點知穎穎竟然說: "倒左佢."
我地好嬲, 並訓話佢唔可以浪費食物, 但佢極度固執, 結果我叫佢去拿一個空的綠色奶瓶,
再抱佢入房, 再偷龍轉鳳地比番原本支奶奶佢, 我地梗係唔會同佢癲咁衰浪費食物架嘛. 不過穎穎o既重點唔係要浪費支奶, 佢就係書中所寫o既一成不變,
佢一定要自己攞奶瓶, 不惜一切要自己攞奶瓶.
程序2) 一定要自己放奶奶在床頭櫃 (如果此時我係冇戴眼鏡,
佢會命令我, 說: "媽咪帶番眼鏡丫" )
程序3)
<<新o既>> 一定要放好自己個枕頭仔同我個枕頭, 如果個枕頭位置歪左, 例如1吋,
即刻眼紅紅嗚咽說: "咁o既!? 媽咪, 枕頭咁o既!?"
然來一定要我放好枕頭的位置程序4) 爬去攞支奶奶, 再放支奶奶在左邊面珠登, 說: "媽咪, 講丫"
我問佢: "講咩呀?"
穎穎答: "熱架, 媽咪, 講丫, 熱架", 一定會 lur 到我講出[熱架]為止, 我唔講,
佢就喊晒發晒脾氣叫我講.
程序5) 論到右邊面珠登 repeat 程序4)程序6) 正式飲支奶, 一邊飲一邊說: "媽咪除眼鏡", 我同佢講: "喉先我冇戴你又叫我戴 番, 依家又叫我除 !?"
穎穎仍然 lur 我除眼鏡. 因為佢認識只有瞓覺先至除眼鏡.
程序7) 一邊飲一邊說: "媽咪, 蓋被被!"
我便幫佢蓋被子
程序8) <<新o既>>
如果睡房已經開左風扇, 會出現以下對話:
穎穎說: "媽咪息風扇"
我關掉風扇
穎穎接著說: "媽咪開風扇", 我說: "喉先你叫我息, 依家你又叫我開, 唔可以咁架, 我唔會開, 你咁樣, 個風扇會壞"
如是者我地糾纏左一陣, 我再去開番個風扇. 穎穎o既重點唔係玩風扇, 佢有一個堅持, 係要睇住媽咪開個風扇比佢.
如果入房時已經開左冷氣, 會出現以下對話:
穎穎一邊飲奶一邊說: "媽咪開風扇"
我說: "開左冷氣唔可以開風扇, 會好凍架, 一係開冷氣, 一係開風扇, 只可以一樣"
穎穎又叫又喊, lur 我開風扇, 即是書中所講一成不變.
如是者我地糾纏左好耐, 穎穎嘈到整醒雯雯, 最後我唯有開一度風扇, 較細個冷氣, 等穎穎瞓著先至息番個風扇.而最煩人o既, 就係做完程序 1 至6, 我已經好鬼攰, 而佢 lur 我時, 往往又叫又喊嘈醒亞妹, 要爸爸氹番雯雯瞓, 真係一人 mark 一個都唔掂. 又搞到我唔夠瞓, 好辛苦.
程序9) <<都係新o既>>
飲完支奶奶 (大約十幾分鐘飲完), 穎穎要同我交換位置, 交換枕頭瞓, 穎穎會說: "唔該借借", 我唔肯, 話細路仔唔可以瞓大人個枕頭,
對你條頸唔好, 但穎穎堅持, 不停說: "唔該借, 借唔該借借, 唔該借借呀"我真係支持唔住喇, 真係好攰, 被迫拖著疲累o既身軀轆去佢個位, 被迫瞓佢o既 tiny tiny pillow !
然後穎穎就爬過我身軀, 轆去我個位, 瞓埋我個枕頭.
唔好以為我可以瞓得覺喇, 因為我要等穎穎瞓著, 再慢慢拓起佢頭, 同佢交換番個枕頭, 費事佢瞓大人枕頭拗親條頸.* * *
到講下近4日出現o既奇怪又煩人的要求, 就是臨睡前強烈要求去公公家睡.
(又忍唔住要用口語化寫)
2010年6月2日晚, 做晒以上程序, 穎穎忽然說: "去公公度瞓"
我問: "點解呀?"
穎穎一如以往, 我問親佢[點解], 佢總是唔出聲.
佢不停 lur 我, 說: "去公公度瞓", "同公公瞓"
又嘈醒雯雯喇. 我一睇錶, 已經 12:45 a.m., 無理由打擾兩位老人家架嘛, 但穎穎真係好堅持, 又嘈醒雯雯, 我地冇計, 非常唔好意思帶佢落樓下去公公家過夜.
第二日, 公公話番比我地聽, 佢要一個人睡在地上的床舖 (因為大人床的旁邊, 是放了一塊床舖的, 用作平時比兩個BB 玩都玩得安全d), 穎穎一上張床, 好快瞓著覺.
6月4 & 5日晚, 又出現以上情況, 在公公家過夜.
6月6日(星期日), 又出現以上情況, 我地諗, 咁樣唔係辦法, 今次我地企硬, 穎穎就 lur 到喊晒, 淚流滿面, 說: "我唔同媽咪瞓", "去公公度瞓"
由佢6月2日話要去公公度瞓, 我已經好hurt 好心痛, 點解個囡會咁? 我對佢咁好, 佢就話唔同我瞓. 爸爸話, 係因為我對雯雯好, 對穎穎差喎, but I don't agree with him.
咁今次我地企梗, 我又氹, 又唱歌, 又話講故事比穎穎聽, 但通通比佢 reject.
之後佢話要我抱佢, 仲要係企住抱, 我就帶住疲累o既軀殼企o係度抱佢.
抱左一陣, 佢堅持話要去公公度瞓, 咁我開電視比佢睇, 睇睇下仲話要睇 Music (何韻詩)添, 由於佢越睇越精神, 我見唔對路, 就息電視, 跟著我同佢就繼續糾纏喇. (呢段期間佢唔比我息燈)
穎穎 lur 下, 又瞓下, 到左大約 1:45 a.m., 我同佢講: "唔去公公度啦", "爸爸黎陪你瞓好唔好?", 佢答"好"
咁我就出左去客廳瞓, 之後o既事就唔知喇.
今日返工, 精神上係好攰, 因為我諗緊係咩原因, 諗緊應該點樣去處理呢件事? 最離譜係佢夜ma ma 忽然想去人地屋企瞓, 次次問佢[點解]佢又唔出聲,
In fact, she didn't know the meaning of [點解].
我又諗, 係咪平時太遷就佢, 搞到佢一定要 lur 到我順佢意為止? 係咪我平時對佢太好太林, 搞到佢咁?
- 穎穎係咪想學自己訓? 你可以係屋企試下比佢自己訓, 咁咪唔會打擾公公婆婆!Reply this comment
-
KatieMami多謝你既分享啊~ 穎穎對呢d事都真係好固執, 習慣都有分好同壞, 只係唔係壞習慣就盡量滿足佢啦!Reply this comment
-
我家兩豆丁 - audreyMAmiaudrey嘅一成不變又係好嚴重架... 唉~~Reply this comment
-
amy穎穎真係令你好懊惱啵~~Reply this comment
-
AngelaI like the article!! Nice sharing.....Reply this comment
